Pidato Bahasa Bali 1

Suksma aturan titiang majeng ring pangenter parikrama antuk galah sane katiba ring sikian titian.

v  Para Darsika miwah uleman sane wangiang titiang,

v  Taler para Ida dane utawi semeton pamilet sane sihin titiang,

Om Suastyastu,

Angayubagia uningayang titiang majeng ring Ida Sang Hyang Widhi Wasa, saantukan wantah sangkaning asung kertha wara nugraha Ida, iraga prasida kacunduk masadu ajeng sakadi mangkin ring galahe sane becik puniki. Ampura ping banget lungsurin titiang ring Ida dane sinamian, riantukan tambet titiange kalintang, nanging purun nglangkungin linggih Ida dane pacang maatur-atur samatra nganinin Indik ” Sasananing Sisya ring Guru Pengajian”.

Ratu Idadane dane sane wangiang titiang, manawi iraga sareng sami sampun pastika uning sane kabaos Guru Pengajian. Guru Pengajian inggih punika guru sane wenten ring sekolah, sane sampun ngajahin iraga memaca, nulis, lan maitung-itungan. Wyakti akeh tur mabuat pisan peplajahan sane kapicain olih Bapak lan Ibu Guru ring sekolah. Yan nirgamayang titiang, Bapak lan Ibu Guru punika sekadi sundih sane prasida nerangin kauripan iraga sareng sami. Yan baosang sekadi baos mangkin “Menerangi Kehidupan Manusia”.

Nika mawinan iraga dados sisya tan wenang lempas ring pitutur Guru. Napi malih drowaka ring Guru. Sinah pacang kebaos Alpaka Guru. Anake sane alpaka nenten pacang ngemangguhang kerahayuan ring jagate.

Mangdane prasida rahayu, sepatutnyane iraga dados sisya setata subakti ring Guru. Napi manten sane patut kalaksanayang mangda nyihnayang iraga subakti ring Guru Pengajian?. Akeh sane dados kalaksanayang yening iraga jagi nguncarang bakti ring Guru Pengajian, inggih punika; hormat ring Bapak taler Ibu Guru ring sekolah, jemet melajah, setata ngelaksanayang kapatutan sane mungguh ring awig-awig sekolah, lan setata ngelaksanayang pitutur Bapak lan Ibu Guru. Yan iraga sampun subakti ring Guru, sinah kerahayuan jagi pacang kapangguh.

Inggih Ratu Ida dane sane kusumayang titiang, yukti akeh sampun titiang mabaosan, kaping untap titiang ngaturang suksmaning manah ring Ida dane sareng sami santukan sampun prasida rauh lan mirengin pidarta titiang puniki, dumogi napi sane sampun kabaosan mangkin wenten pikenohnyane. Yening wenten bebaosan titiang sane ten becik, titiang nunas ampura. Sane mangkin ngiring sineb antuk prama santhi,

‘Om Santhi, Santhi, Santhi, Om’