SATUA BALI (Cerita Bali)

I LUTUNG TEKEN I KEKER

Kacerita ada Lutung, masusupan di tengah alase, saget ningeh munyin keker makruyuk di carang kayune. I Lutung ngalih tongos I Keker matinggah ane sedekan ngamah be. I Lutung nangsek saha mamunyi alon, “Uduh iba Keker olasin je wake! Wake katunan amah-amahan, dija mirib ada tongos ngalih babuktian. Tinggalin awak wakene berag tuh, wake dot masawitra ngajak iba”.

I Keker masaut alon, “Uduh Lutung tegarang melahin minehin. Dija ada unduk buron buka iba, lakar sida masawitra teken soroh paksi? Apa buin iba buron dengkal, demen nguluk-nguluk. Wake suba nawang bikas ibane demen ngadug-adug ngeka daya upaya jele demen ngae pisuna. Pantes iba nemu sengsara.

I Lutung makenyung manis lantas mamunyi, “Uduh iba Keker, kaliwat baan iba ngatgatang jelek wakene. Yen keto munyin ibane satmaka ngemadakang wake apang enggal mati. Cara jani liu anake ngadu, ada ngorahang ane tuara ada. Eda ngugu orta ane tuara-tuara, raos anak mula sengka baan nampi, bilih-bilih dadi pisuna. Ento patut tangarin, sadu darmane patut rajegang, anggon ngukuhang pati uripe, matane anggon medasang, ditu mara lakar janten ane madan sujati, ento krana jani buktiang.

Mara keto munyin I Lutunge, I Keker engsek ningeh, sawireh ia ningeh orta I Lutung corah, ane tuara taen tepuk kasujatianne. Metu keneh I Kekere kapiolasan, ensap teken sesenggake, “Bungute juruhina, jite kabandilin”, Laut masaut I Keker, “Nah Lutung buin mani jalan luas ka pasihe kangin ngalih be. Sakewala eda ensap iba teken janji.

Kacrita jani I Keker ajaka I Lutung suba liu maan be, laut I Keker ngajak I Lutung ka pasisi. Disubane neked dipasisi, I Lutung tundena ngelebang batisne I Keker, sakewala jeg sahasa I Lutung ngilut batis I Kekere tur bulune kabutbut kanti telah. Ditu I Keker nyaru-nyaru mati. I Lutung kedek ngikik, “melah-melah iba luas ka sunia loka”. Ditu I Lutung ngalih api di padukuhan. I Keker nyelisib ka bete sambilanga ngeling, sawireh bulune telah.

Saget ada sampi teka tur kapiolasan teken I Keker. I Sampi lantas ngwales teken I Lutung. I Lutung buin ajaka ka tengah pasihe, lakar ngalih woh-wohan ke selat pasihe. Neked di tengah pasihe, I Lutung kutanga teken I Sampi. Ditu I Lutung ngeling tusing nyidayang ka pasisi. Kacrita ada penyu, laut metakon teken I Lutung, “Ih iba Lutung ngudiang iba dini?” Masaut I Lutung, “Icang kauluk-uluk teken I Sampi orahanga lakar ajaka ngalih woh-wohan selat pasih. Yen iba olas ajak icang ka pasisi. Neked di pasisi I Penyu nagih upahne, sakewala I Lutung ane mula corah ento ngewales pitresnan I Penyu baan daya corah. I Penyu kabadingan tangkahne merep menek, mawastu tusing ngidayang mabading lan majalan. Ento kranane eda kadropon ngugu raos, apang eda cara sesenggake “Suba belus mara macingcingan”.