Sejarah Aksara Bali

SEJARAH AKSARA BALI
Sejarah aksara Bali nenten sida lempas ring panglimbak aksara saking India, santukan panglimbak agama Hindu miwah Budha ring panegara Indonesia, taler rauh ring Bali kasarengin antuk basa miwah aksarannyane.

Ring panegara India Wenten aksara sane kawastanin aksara Karosti. Saking aksara Karosti puniki nglimbak dados aksara Brahmi. Mawit saking aksara Brahmi puniki nglimbak dados aksara Dewanegari miwah aksara Pallawa. Aksara Dewanegari kanggen ring India Utara sajeroning nyurat basa Sansekerta. Aksara Pallawa kanggen ring India Selatan sajeroning nyurat basa Pallawa.

Panglimbak aksara Dewanegari miwah Pallawa ring Indonesia nganutin panglimbak agama Hindu miwah Budha. Mawit saking panglimbak aksara Dewanegari miwah Pallawa puniki mawetu wenten aksara Kawi utawi aksara Indonesia Kuna. Saking aksara Kawi puniki kasuen-suen ngraris mauwah dados aksara Jawi miwah aksara Bali, taler dados aksara-aksara sane tiosan sane mangkin wenten ring Indonesia. Pinaka cihnannyane silih tunggil kakeniang ring Kutai (Kalimantan Timur) sajeroning yupa, sane madaging sesuratan aksara Dewanegari.

Ring Bali panglimbak aksara Dewanegari miwah aksara Pallawa kakeniang ring Pura Penataran Sasih Pejeng, Kecamatan Tampaksiring,-Kabupaten Gianyar. Ring Pura Penataran Sasih kakeniang stupa-stupa kecil sane medaging cap antuk tanah legit. Sajeroning cap-cap punika madaging sasuratan aksara sane kawastanin aksara Pradewanegari utawi Siddhamantrka. Sesuratan aksara punika kanggen nyuratang mantram Buddha Tathagata. Panglimbak salanturnyane ring Pura Blanjong Sanur, wenten kakeniang tugu peringatan raja Sri Kesari Warmadewa sane madaging aksara Dewanegari miwah aksara Bali Kuna. Aksara Dewanegari kanggen nyurat basa Bali Kuna, aksara Bali Kuna kanggen nyurat basa Sansekerta.

Aksara selanturnyane waras nglimbak Wantah aksara Pallawa. Pinaka cihnannyane kakeniang sesuratan aksara Pallawa sane kawastanin aksara Semi Pallawa. Mawit saking aksara Semi Pallawa puniki ngraris nglimbak wangunnyane dados aksara Kediri Kwadrat, miwah dados aksara Jawi rauhing dados aksara Bali. Sesuratan aksara Pallawa puniki minakadinnyane wenten kakeniang ring Pura Bale Agung Sembiran. Wangun aksara Bali gumanti bunteran, puniki wantah cihnannyane wangun aksara Bali mawit saking sesuratan aksara Pallawa. Cihnan panglimbak aksara Dewanegari sajeroning aksara Bali minakadi wangun aksara a kara Bali masaih pisan ring aksara a Dewanegari.

Kaketus saking: Buku Pedoman Pasang Aksara Bali